Zum Seitenanfang
#Kolumne – Matthias Höllings
28. August 2021

Lees di dat mal döör

Plattdüütsch, is dat nich schön? Matthias Höllings rollt in seiner Kolumne den roten Teppich aus für Bremens sprachliches Kulturerbe.

Plattdüütsch, is dat nich schön? Matthias Höllings rollt in seiner Kolumne den roten Teppich aus für Bremens sprachliches Kulturerbe.

Wer Dag för Dag sien Arbeit deit, un jümmers op sien Posten steiht, un deit dat goot un deit dat geern, de draf sik ok mal amüseern.“ So is’t, Lüe, dat hebbt wi us verdeent, dat wi bi de „2. Grote Plattdüütsch-Gala“ in’t Metropol-Theater Bremen dorbi sünd. Harr egentlich al een Johr ehrder wesen schullt, man dat lege Corona-Virus hett us jo all de schönen Plaans toschannen maakt!

Plattdüütsch steiht jo al lang op de List för dat „immaterielle Kulturerbe“ vun de Unesco, kann’s man opstunns noch nich verlangen, dat de Bayern us verstahn doot. Bi de erste Gala in Kiel heet dat: „Plattdüütsch is een wunnerbare Spraak, de dat verdeent hett, fiert to warrn, so richtig mit roden Teppich un so.“ Un düt Johr wüllt wi dat in Bremen doon. Ji könt all jo Schapptüüch herkriegen un jo fein optakeln för dat Event, jüst so as de beiden Moderatoorn. De een heet Detlef Wutschik, de hett jümmerto swatte Kledaasch an, un op sien Knee sitt so’n patzige Popp, de sik Werner Momsen nöömt un meist jümmer allens beter weet. Düt ole Klappmuul snackt bloots Platt, egentlich snackt jo Momsen sien ‚Stüermann‘, de Wutschik. De is ut Achim, also Butenbremer, un de kann dat. Un keen is de twete Kolleeg op de Bühne? Dat is’n ganzen Swatten, de kummt ut Falkenbarg bi Gannerkesee, heet Yared Dibaba un hett sien Plattdüütsch inne School leernt. Momsen (Wutschik) un Dibaba wüllt dat Publikum in’n Metropol-Theater Bremen een högligen Abend mit Musik, Theater, Comedy un Poetry-Slam präsenteern.

Dibaba is jo egentlich an’n Hoorn vun Afrika born un mit sien Familje vunwegen den Börgerkrieg dor na Düütschland flücht’t. Un hier hett he denn al as lüttjen Pööks ok Platt leernt. „In’n Plattdütschen gifft dat keen Wort för ‚Flüchtlinge‘. Dat sün allns Lüüt, Minschen, Kinners, Olle, Froons, Manns – so as du!“ Is dat nich schön? Noch veel schöner weer dat, wenn Ji all na’n Metropol-Theater Bremen kaamt, to’n Platt snacken, to’n Lustern un Jo dat goot gahn laten. Gifft keen Utflücht, vunwegen „Keen Tiet“. Dat geiht na dat Motto: „Jümmer suutje un gediegen, wat nich fardig warrt, blifft liegen.“

Platt leevt, leve Lüe! An’n 2. Oktober 2021 in’n Metropol-Theater, Klock 8 ’s Abends. Seht to!

Weitere Beiträge